نرجـسيـهـ قصيده للشاعر فيصل العدواني

نرجسيه.. نرجسيه.. أذكر إنها نرجسيه
كلمةٍ مطلع قصيده راودتني من زمان

كنت أبكتبها ولكن عيت ظروفي عليه
والزمن أيضا حداني وبعدها كان اللي كان

نرجسيه يا علـي بنتٍ تمادت بالخطيه
أسرفت في حالي حتـى عفتهـا يابورزان

بعثرت عمري شظايا بين ذيك وبين ذيه
ولاقويت أجمع شتات العمر وأطراف الحنان

أذكر إني كنت أهوجـس في غلا هالأدميه
وأحسب للحزة لقاها هالدقايق والثوان

وأذكر إني كنت أشكك في وجـود الجاذبيه
وأتساءل ليه أطير إليا دعتني في مكان

وكنت أظن إن النهار إليا ظهر ثم بان ضيه
إستمد النور منها ثم خذى منها ضمان

والضمان إنها تصون السـر عن كل البريـه
ما تخبر به قريب ولا يسولف به لسان

جادل ربي حباها فـي ملامح يوسفيـه
عنــق وإلا خسـر وإلا..يادخيل المستعـان

إن تهادت في خطاها تسلب العقـل برويه
وإن تثنت شحت كفـي وش بقى للخيزران

وإذا إنتثر مجدولهـا اللي حشى ما شفت زيه
فاح ريح العـود وإلا هو عبير القحويان

من نظرها كنه اللي ماحسـب طعنة خويه
ولاله إلا لاتبسـم ثغرها عض البنان

لو نظرها إبن الملـوح عاف ليلى العامريه
يختلف طرقه ونهجه وتصبـح العشره ثمان

يترك الشعـر المقفى والحروف الابجديه
أو يهيجن هيجنة بدوٍ لهم عزه وشـان

أشهد إنهـا من عذابـي ياعلي ماهـي بريـــه
قلبها قاســي ونـادر مـا تمايلـي ولان

عرضتني للهجير وقالت أمشيلك بفيـه
واتركتني للسهاد ولوعة أصفـاد الهـوان

واستباحت كل عرق من عروقي والضحيه
حبنا اللي من سواهـا ما صفـا مره وزان

عنجهيه ونرجسيـه..نرجسيـه وعنجهيـه
حلها وشلـون مـدري!!طالبك يابـو رزان

نرجسيه قصيده لشاعر فيصل العدواني