إخذي وعد مني وأبي منك ميعاد

اخذي وعد مني وابي منك ميعـاد
نبقى على طول الليالـي حبايـب
حبك بقلبي قـام يابنـت يـزداد
يزداد في طول الليـال الغرايـب
بجيك لو انك وراء كـل الابعـاد
ويصير قلبي من قليبـك قرايـب
دامي بجنبك كل ساعاتـي اعيـاد
مرتاح لو كثرت علي المصايـب
اسهر على طيفك والاجواد هجـاد
ودموع عيني فوق خدي سكايـب
ودي على شوفتك يابنت الاجـواد
مدام قلبـي يالغـلا فيـك ذايـب
انا على صوتك وهمستك معتـاد
وسوالفك تبري العظام الصوايـب
قالت اخذ مني وعد يابـن الأجواد
منساك لين انحط بين النصايـب
منساك حتى لو هرج كـل حسـاد
اللي يحبـون الحكـي والعجايـب
قلبي على شوفتك يابـنـدرمنقـاد
واحسب على جيتك كل الحسايـب
لكن عجل بالسفـر كانـك جـاد
يم الرياض ونجد سوق الركايـب
قلت المسافه بيننا سيفهـا حـاد
بجيك لو حتـى تجيلـي سبايـب
واسج بك في ديرهٍ غيـم وبـراد
فيها المخايل والمطـر والهبايـب
واكتب لك ابياتٍ جزيلات وجـداد
ونرقى على رؤس الجبال النوايب
نسهر على نور القمر بين الاسياد
ونعدد نجوم السماء في السرايـب
بفكارنا نرقى على روس الاشهاد
ومن التعب نرتاح فوق السحايب
اخذي وعد مني وابي منك ميعـاد
نبقى على طول الليالـي حبايـب